Student councils in action: developing a democratic school culture

 

Курсот “Student councils in action: developing a democratic school culture” (Ученичките совети во акција: развивање демократска училишна култура) е наменет за наставници кои сакаат да ја поттикнат активната улога на учениците во училишниот живот и да придонесат за создавање демократска, инклузивна и соработлива училишна средина.

Преку овој курс се запознаваме со значењето на ученичкото учество во донесувањето одлуки и со улогата на ученичките совети во развивањето демократски вредности. Се истакнува дека учениците не треба да бидат само пасивни учесници во образовниот процес, туку треба да имаат можност слободно да го изразуваат своето мислење, да предлагаат идеи, да укажуваат на проблеми и активно да учествуваат во подобрувањето на училишниот живот.

Посебно внимание се посветува на формирањето и функционирањето на одделенските совети, како важен прв чекор кон поголемо ученичко учество. Преку нив учениците учат како да дискутираат, да ги слушаат и почитуваат мислењата на другите, заеднички да донесуваат одлуки и да преземаат одговорност за нивното спроведување. Исто така, се истражува како одделенските совети можат да се поврзат со ученичките совети и пошироките процеси на развој и унапредување на училиштето.

Курсот нуди практични насоки за тоа како наставниците можат чекор по чекор да организираат и водат состаноци на одделенските совети, како да ги охрабрат учениците да учествуваат и како нивните предлози и идеи да станат дел од реалните училишни активности. Се нагласува и важноста на соработката меѓу учениците, наставниците и раководството на училиштето при создавањето позитивна демократска училишна култура.

Курсот се реализира онлајн, со самостојно учење, без фиксни рокови и задолжителни состаноци. Учесниците ги совладуваат содржините и ги изработуваат предвидените активности во време и темпо што им одговара. По успешно завршување се добива дигитален сертификат.

Главната порака на курсот е дека демократската култура во училиштето се гради преку активно учество на учениците, почитување на нивниот глас и вклучување во донесувањето одлуки. На тој начин училиштето станува место каде што учениците не само што учат за демократијата, туку секојдневно ја практикуваат. Целта е да израснат во самостојни, критички настроени и одговорни личности, кои ќе знаат да размислуваат со своја глава, да ги препознаваат вистинските вредности и да носат одлуки врз основа на сопствените убедувања. Да не дозволат да бидат инструмент во туѓи раце, ниту да веруваат во ветувања за успех без труд и одговорност, туку свесно и слободно да го избираат својот пат, без некој да одлучува наместо нив и против нивната волја

Fostering Civic Engagement in Students

Курсот “Fostering Civic Engagement in Students” (Поттикнување на граѓанскиот ангажман кај учениците) е наменет за наставници кои сакаат да ги оспособат учениците да станат активни, одговорни и информирани граѓани, подготвени да учествуваат во животот на својата заедница и општеството.

Преку овој курс се запознаваме со значењето на демократијата, човековите права, еднаквоста, инклузијата, почитувањето на различностите и владеењето на правото. Посебно внимание се посветува на европските вредности и европското граѓанство, како и на правата и одговорностите што ги има секој граѓанин. Се разгледуваат и современите предизвици со кои се соочува демократијата, како и начините на кои младите можат активно да придонесуваат во донесувањето одлуки и решавањето на проблемите во својата средина.

Курсот нуди теоретски знаења, но и практични насоки и активности кои наставниците можат да ги применат во секојдневната работа со учениците. Преку различни примери, интерактивни задачи, дискусии и анализа на конкретни ситуации се учи како да се поттикнува критичкото размислување, слободното изразување на мислењата, меѓусебното почитување и прифаќањето на различните ставови. Исто така, се истакнува важноста од создавање училишна средина во која секој ученик и вработен ќе се чувствува прифатен, почитуван и охрабрен да учествува.

Посебен дел од курсот е посветен на осмислување наставни активности и проекти преку кои учениците ќе можат да ги применуваат стекнатите знаења во реални ситуации, да препознаваат проблеми во својата заедница, да предлагаат решенија и да развиваат чувство на одговорност и солидарност.
( https://nasmedium.blogspot.com/2025/06/blog-post_12.html )
На тој начин, наставникот не е само пренесувач на знаења, туку и поттикнувач на демократски вредности и активно граѓанство.

Курсот се реализира онлајн, со можност за самостојно учење во време и темпо што му одговара на учесникот. Нема задолжителни состаноци или фиксни рокови. По успешно завршување се добива дигитален сертификат.

Главната порака на курсот е дека училиштето има важна улога во создавањето генерации кои ќе размислуваат критички, ќе ги почитуваат човековите права, ќе ги прифаќаат различностите и активно ќе придонесуваат за подобро, поправедно и подемократско општество.